Eze 16 | ZomZIV | STEP | TOPA thu kei tungah hong tunga:

Ezekiel 16

A Muanhuai Lo Jerusalem tawh Tehkakna

1 TOPA thu kei tungah hong tunga: 2 “Mihing tapa aw, Jerusalem a kihhuai gamtatnate hangin maitang salh inla, 3 ‘Hih in Thupipen TOPA in Jerusalem tunga a gen ahi hi: Na pu na pate ua kipan na suahna uh Canaan-te’ leitang ahi hi; na pa Amor-te hi a, na nu Hit-te ahi hi. 4 Na suah tungin na lai kitan loin na sian nadingin tui in hong kisil lo a, ci inlah kinul loin puan inlah hong kitun lo hi. 5 Nang tungah hihte hih ding zahin kuamah in hong hehpih lo in hong khuatuah lo hi. Na suah-a kipan a kihhuaisa na hi manin lopaang ah hong kipai hi.

6 “Tua ciangin na kiang kong tawn a, na sisan laka kipekpek hong mu-in; sisan lak a lum kim lai nang tungah, “Nungta in!” ^{▼▼16.6 Hebrew khutgelh tawmkha, Septuagint le Syriac; Hebrew khutgelh a tampen in “Nungta in” Na sisan lak ah na lum-a nang kiangah “Nungta in”} kong ci hi. 7 Lo sunga singkung bangin kong khangsak hi. Na lian semsem a, khangtoin suangmanpha ^{▼▼16.7 Ahikeh a khankhin} melhoih penpen na suak hi. Na nawi bawk in na mul po ta a, nang lah na guaktangpi na hi lai hi. ^c

8 “Tua nungin na kiangah kong pai-a nang kong et ciangin it theih tham cingta na hilam kong mu hi; ka puan mongkhat kong zawna na selsim teng kong khuhsak hi. A lipkhaphuai-in nang tungah hong kiciam in, nang tawh thu i ciamkhawm a, nang kei aa na suak hi, Thupipen TOPA in cikhia hi. ^d

9 “‘Tui in kong pumsil a ^{▼▼16.9 Ahikeh kong pumsilsa}, na tunga sisante hong sawpsakin kizutnate in kong zut hi. 10 Hoihtaka kiphan puan kong silhsak a, savun khedap kaih kong bulhsak hi. Saihadial puan hoihte in kong zema, puan man tamte in kong tuam hi. 11 Suang manpha in kong zem a, na banah tau hong bunsakin, na ngawngah khi kong oksak a, 12 nak bah hong batsakin bilbah kong batsaka na lu ah kumpi lukhu melhoih kong khusak hi. 13 Tua bangin ngun le khamin hong kizem a, na puansilhte saihadial puan hoih le nai puan manpha le hoihtakin kiphana a kizem puan ahi hi. Na annek: buhnel hoih khuaizu le olive thau ahi hi. Na melhoih mahmah a, kumpinu a suak dingin na khang hi. 14 Na melhoihna hangin minamte lakah na minliatna kizel a, kei hong piak thupina in na mel hoihna a kimsak hi. Thupipen TOPA in cikhia hi.

15 “‘Ahi hangin na mel hoihna na muanga na minliatna kizuakna in na zang hi. Na kianga hong pai peuhpeuh tungah na uukna na uangzat lua a, ama aa ^{▼▼16.15 Hebrew khutgelh tampen; Hebrew khutgelh khat (Septuagint khutgelh pawlkhat en in) a piang ngei lo tua bang na} na suak hi. 16 Na puansilh pawlkhat munsangte nopcit nadingin na zanga tua munah na kizuakzuak hi. Hici bang na piang ngei lo tham loin na sep ngei loh ding ahi hi. 17 Nang in kei hong piak suangmanpha hoihte keima ngun le khamte la-in pasal limin na bawla, tuate tawh na kizuak hi. 18 Hoihtaka kiphan a kizem na puante la-in tuate na silhsak a, tuate mai-ah ka sathau le ka gimnamtui in na bia hi. 19 Na an dinga kong piak annel hoih, olive thau le khuaizu na nek dinga kong piak te - gimnamtui dingin tuate mai-ah na lui hi. Thu omzia tua bang ahi hi, Thupipen TOPA in cikhia hi.

20 “‘Tua ciangin kei tawh na neih na tanu na tapate paipihin milimte an dingin biakna-in na pia hi. Na kizuakna hawmthawh lai na hi hiam? 21 Ka tate ^{▼▼16.21 Ahikeh amaute mei tawnin na paisak hi.} go-in milimte biakna-in na pia hi. 22 Na kihhuai gamtatna le na kizuaknasate hangin bangmah silh lo na guaktangin na sisan laka na kipekpek lai hun, na khangno lai nite na phawk nawn kei hi. ^h

23 “‘Gimna thuak ta in! Nang tungah gimna hong tung hi, Thupipen TOPA in cikhia hi. Na gitlohna dang khempeuh na behlapna-in, 24 mihon khawl theihna mun tengah mun sangtuam bawlin biakbukno na lam hi. 25 Kong zing bul citeng ah biakbuknote na lama na mel hoihna muh thadahhuaina suahin na kiang hong tawn peuhpeuh tungah kitah in na huuk semsem hi. 26 A lan mahmah Egypt-te tawh na kituah ciangin na luppih a, na huuk semsemna in kei hong hehsak hi. 27 Tua ahi ciangin na langah ka khut zanin na gamgi ka khiam ding hi; na huukluat gamtatna in a linsak Philistia tanu nang hong hua na galte tungah kong piakhia ding hi. 28 Na hihnasa ah lungkim zo nai lo na hi manin Assyria mite tawh zong lumkhawm dingin na zol hi; tua khit nangawnin na lungkim zo nai kei lailai hi. 29 Tua ciangin sumbuk nasem ahi Babylon ^{▼▼16.29 Ahikeh Chaldea-te} mite na zol sawnsawn a, ahi hangin hihte nangawn tawh zong na lungkim zo tuan nai kei hi. ^j

30 “‘Gina kei na lawmlawm cia, hih banga na gamtat ciangin numei khohlah kizuakte banga gamta na hi maw! Thupipen TOPA in cikhia hi. 31 Lamkabom citengah bosang bawlin mihon omna tual-awng tengah biakbuknote na bawl uh ciangin thaman ngen lo na hi manin numei kizuakte tawh na kibang kei uh hi. ^k

32 “‘Mi ang a kawmsanpa zi na hi hi! Na pasal sangin khual mite na deihzaw hi. 33 A kizuak peuhmah in a kizuak man a ngah hi; ahi hangin na itte khempeuh tungah letsong pia-in na lunggulhte mun khempeuh pan hong pai nadingin golhsum na pia zawsop hi. 34 Tua ahi ciangin nang kizuakna midang aa tawh a kilehbulh hi. Nang angvanna kuamah in hong delh kei hi. Nang in aman na piazaw a, nang tungah kuamah in hong pia lo ahi manin na kinak lehbulh mahmah uh hi. ^l

35 “‘Tua ahi ciangin nang a kizuaknu aw, TOPA thugen za in! 36 Hih in Thupipen TOPA gen ahi hi! Na hauhna ^{▼▼16.36 Ahikeh huukluatna} khempeuh sungkhia in, na lawmpa tungah na guaktang hina na lahna-in a kihhuai milimte khempeuh bia-in tuate tungah na tate uh sisan na pia hi. 37 Tua ahi ciangin na itte, nuam na kisakpihte, le na muhdahte na itte tawh a kibangin ka kaikhawm dinga na kimkot ah omsakin amaute mai-ah na puan kong hawkkhiatsak dinga na selsim khempeuh a mu ding uh hi. 38 Angkawm le sisan a luangsak numeite bangin thukhenin dan kong tuaksak ding hi. Ka hazat hehna a ka thangpaih luatna sisan phulakna nang tungah kong tusak ding hi. 39 Tua ciangin na itte tungah kong ap dinga amaute in na bosangte phelkhia-in na milim biakbuknote a susia ding uh hi. Na puan hong hawkkhiatsakin na kizepna manphate hong laksak ding uh a, na guaktangpi in hong nusia ding uh hi. 40 Amaute in mipite hong dosak ding uh a, suang in hong dengin namsau-in hong semnen ding uh hi. 41 Na innte haltum ding uh a, numei tampite muhin dan hong tuaksak ding uh hi. Na kizuakna pan kong khawlsak dinga na itte sumin na guai nawn kei ding hi. 42 Tua ciangin nang tunga ka thangpaihna damta dinga, haza a ka hehluatna a kam ta ding hi; ka dai dide dinga ka heh nawn kei ding hi. ⁿ

43 “Na khangno lai nite na phawk nawn lohna hangin hihte tawh keimah hong hehsak lua na hi manin na hihsate nangma lutungah kong tusak pelmawh ding hi, Thupipen TOPA in cikhia hi. Na gamtatna kihhuaite khempeuh behlapin huuk lua hi lo na hi hiam? ^o

44 “‘Paunak a bulh mi peuhmah in hih paunak “Tanu in a nu sun,” cih nang tungah a bulh ding uh hi. 45 Nang in a pasal le a tate a simmawh na nu’ tanu taktak na hi hi. A pasalte uh le a tate uh a simmawh na sanggamnute’ sanggamnu taktak na hi hi. Na nu Hit-te hi a, na pa Amor-te ahi hi. 46 Na u nu Samaria, na omna leilu-lam ah a tanute tawh tenga; na naunu na omna leitaw lama a tanute tawh a teng Sodom ahi hi. 47 Amaute nungah pai-in a kihhuai a gamtatnate uh ciing bek loin na paina khempeuh ah amaute sangin na uangzaw hi. 48 Thupipen TOPA in ka nuntakna ka lo hi, na sanggamnu Sodom le a tanute in nang le na tanute hihte a hih ngei nai kei uh hi. ^p

49 “‘Na sanggamnu Sodom mawhna hih ahi hi: Amah le a tanute kiphasakin, khamvalin ne-in kuamah thudon loin om uh hi; a zawngte le a tasamte huh lo uh hi. 50 Amaute kiphasak mahmahin ka mai-ah a kihhuai na sem uh hi. Tua ahi ciangin na muhsa bangin amaute ka maimangsak hi. 51 Samaria in nang gamtatsia zah lang a gamta kei hi. Nang in amaute sangin a kihhuai na tam na semzaw a, na hihsa hih nate khempeuh in na sanggam numeite thumaan tawh kibangsak hi. 52 Na sanggam numeite diktansakna guan na himanin na zahlakna nang thuak in. Bang hang hiam cih leh amaute mawhna sangin nang aa a siahuaizaw hi. Tua ahi ciangin na sanggamnute amaan tawh kibangsak na hi manin maizumpi in na zahlakna nangmah in thuak ta in. ^q

53 “‘Bangbang ahi zongin Sodom le a tanute le Samaria le a tanute a ngeina ka bangsak dinga, nang aa zong tuate mah ka bangsak ding hi. 54 Tua in na gamtatnasate hanga na zahlakna le na maizumnate in - amaute a hehnem ding hi. 55 Tua ciangin na sanggamnute, Sodom le a tanute a ngei uh bang kik dinga; nang le na tanute zong na ngei uh na bang kik ding uh hi. 56 Na gitlohnate hong kipholak ma 57 na kiphatsak hun lai-in na sanggamnu Sodom na gen kha ngei beek kei hi. Tu nangawnin Edom ^{▼▼16.57 Hebrew khutgelh tampite le Syriac; Hebrew khutgelh a tampen Septuagint le Vulgate ah Aram} tanute a vengte khempeuh le Philistia-te tanute - na kimkota omte nang hong simmawhte khempeuh in nang hong zahpih uh hi. 58 Na hukluatna le a kihhuai na gamtatnate a banbanin na tuak ding hi, TOPA in cikhia hi.

59 “‘Hih in Thupipen TOPA gen ahi hi. Ka kiciamnate thusim loin ka thukhun na palsatna tawh kizui-in nang tungah kong tungsak ding hi. 60 Ahi zongin na khangno hun lai-a nang tawh i thukhun phawk kawmin nang tawh a tawntung adingin thukhun ka bawl lai ding hi. 61 Tua ciangin na paizia phawkin nang sanga uzaw nu le nang sanga nauzaw nu - na sanggam numeite na ngah ciangin na mai zum ding hi. Na tanu dingin amaute kong pia dinga ahi hangin nang tawh i thukhun bulphuh a kong piak ahi kei ding hi. 62 Tua ciangin nang tawh thu ka khung dinga keimah TOPA ka hilam na thei ding hi. 63 Na hihsate khempeuh kong thoihdam khit tua hun ciangin na kiphawk kik dinga nang hangin na mai zumin kiniam khiatin na kam na kek nawn kei ding hi, Thupipen TOPA in cikhia hi,’ ci-in gen in,” hong ci hi.